Nangrugin a nakaawat ti nayon a bayad iti inaldaw a sueldo dagiti minimum wage earners ken katulong iti Ilocos ken Western Visayas.
Segun ti National Wages and Productivity Commission, inaprubaran ti Regional Tripartite Wages and Productivity Boards a nangirugi iti nasao a petisyon.
Idiay Western Visayas, ti minimum wage dagiti mangmangged iti non-agricultural, industrial ken commercial sectors nga empleado iti nasurok sangapulo ket agbalinen a P550.
Idinto a dagiti saan nga agsurok iti sangapulo iti empleadona ket agbalinen a P525 kada aldaw ken iti agricultural sector met ket agbalinen a P520 kada aldaw.
Dagiti katulong ket agbalin a P6,500 iti sueldoda.
Iti Ilocos Region ket agbalinen a P505 ti inaldaw a sueldo dagiti mangmangged iti non-agricultural sector nga adda empleadona a nasurok sangapulo a tattao idinto a no saan nga umabot iti sangapulo iti empleadona ket P480 kada aldaw.
Ti minimum wage para kadagiti katulong ket agbalinen a P6,700.
Agtultuloy iti araramiden a panagdenggeg dagiti labor group para iti plano a panagpangato iti sueldo.
