VIGAN CITY – Panaglabsing iti Republic Act 11332 wenno ti Non-Cooperation, Article 151 wenno ti Disobedience ken Bribery ti sangwen a kaso ti maysa a mangisursuro a nagpasuksok kadagiti pannakabagi ti linteg tapno makastrek ditoy probinsia.
Nabigbig ti suspek a ni Bernadet Coquia, agtawen iti tallopulo ket siam a taga-McArthur Highway, San Miguel Calasiao, Pangasinan a nakalugan iti SUV nga idi sinitar dagiti kameng ti linteg ket naduktalan nga awan dagiti kasapulan a papeles a maiparangna sakbay a makastrek.
Nupay kasta, impapilit ti suspek ti sumrek ket nangidiaya ti kuarta kadagiti nakabantay a pulis iti border control point ngem idi saanda nga inawat ket pinatarayna ti luganna isu a nakemmeg.
Iggemen dagiti pannakabagi ti linteg ti suspek tapno dumalan iti husto a proseso.
