VIGAN CITY – Panaglabsing ti Article 266 iti Revised Penal Code wenno Physical Injuries and Threats ken Provincial Executive Order 109 series of 2021 iti sangwen ti maysa a negosyante a nangdangran ti maysa a mangisursuro idiay Sta. Maria, Ilocos Sur.
Ti suspek ket ni Alejandro Chan Peña, agtawen ti uppat a pulo ket pito, naasawan, negosyante, nga agindeg idiay Brgy. Lingsat, Sta. Maria, Ilocos Sur idinto a ti biktima ket ni Melchor Delizo Escobar, agtawen ti uppat a pulo ket pito, naasawaan, mangisursuro ti pampubliko a pagadalan nga agnaed met laeng iti nasao a lugar.
Maibasar ti pakaammo manipod Sta. Maria Police Station, nagturong iti Sta. Maria East Central School idiay Brgy. Poblacion Sur, Sta. Maria ti suspek nga awan ti inaramatna a facemask ken awanan ti quarantine pass ket idi nakitana ti biktima nga adda iti Information Desk nga agsimsimpa ti modules dagiti estudyante ket kellaatna a pinangtaan ket kinunana a “no adda ti paltog ko, pinatay kan”.
Saan laeng a dayta ta innala ti suspek tiu modules ket idanogna ti biktima ken dinanogna babaen ti gemgemna iti akin-kannigid a lapayag ti biktima.
Kinemmeg dagiti Brgy. Officials ti suspek ken in-turn over da kadagiti nagresponde a PNP Personnel iti Sta. Maria ket naipan idiay Ilocos Sur District Hospital, Narvacan para ti medical examination ket nagpositibo iti alcoholic breath test.
