VIGAN CITY – Kalikaguman ni Pepe Adame maysa a mangisursuro idiay San Esteban National High School ngem taga- Narvacan a maysa kadagiti nakapasa iti accreditation kas national technical official ti sepak takraw iti maisayangkat a 30th Southeast Asian Games nga adda iti mabukel nga Ilocos Sur Sepak Takraw Club ta adu dagiti nalalaing a sepak takraw player ken mabalin danton a makigrupo iti Sepak Takraw Association Incorporated ditoy pagilian.
Kabayatanna, nadakamat ni Adame iti pannaki-uman ti Bombo Radyo Vigan a nakasaganan a makipaset iti panagakem na kas technical official iti sepak takraw inton SEA Games a maisayangkat inton November 30 agingga December 11.
Napili ni Adame kas maysa kadagiti national technical official iti benneg ti sepak takraw agsipud ta isuna iti maikatlo iti leveling of technical officials idi January 3 agigga 6 idiay San Fernando, Pampanga manipud kadagiti lima pulo ket siyam a participants iti intero a pagilian.
Inlawlawag na a saan a nalaka ti panagbalinna a technical official ngem agsipud ta isu ti kaykayatanna nga ubraen ket manamnama nga agballigi ti panangakem na iti naipabaklay kenkuana a responsibilidad.
Binalakadanna pay dagiti nagannak a saanda nga igawgawid dagiti annakda iti aniaman a hiligda kas iti isports ta mabalin nga isu ti pagballigi-anda iti masangwanan.
