VIGAN CITY – Dead on arrival ti maysa a mangisursuro a nagmaneho iti motorsiklo gapu iti pannakaidungparna iti railings idiay Heroes Bypass Road a sakupen ti Barangay Oaig-daya, Candon City, Ilocos Sur.
Nabigbig ti natay a ni Diony Mar Manzano Danzalan, agtawen iti duapulo ket innem, taga-Barangay Olo-olo Sur, Santiago, nagmaneho iti Honda Click a motorsiklo.
Maibasar iti imbestigasyon, agpapa-amianan ti motorsiklo iti heroes’ bypass road ket idi madanonda ti nakapasamakan ti insidente, nagslide iti outer lane ti kalsada iti nasurok kumurang duapulo a metro ti distansya ket naidungpar iti railing ti kalsada.
Gapu dayta, nadunor ti nadumaduma a paset ti bagi ti drayber a naipaagas iti Ilocos Sur Medical Center, Candon City para ti pannakatamingna ngem saanen a nakalasat.
Nadadael met dagiti paset ti luganna ken saan pay nga ammo no mano ti gatad ti pannakaipaistimarna.
