Pinasingkedan ti Department of Health a saan pay a kasapulan a maibilin ti panagaramat iti face mask iti baet ti flu season.
Segun ken ni DOH Spokesperson ken Assistant Secretary Albert Domingo, ikonkonsidera ti ahensia ti adu a mayos-ospital ken dagiti mai-admit iti intensive care unit dagiti ospital sakbay ti desision nga inkapilitan a panagaramat iti face mask.
Nagballaag ni Domingo a mabalin a gundawayan dagiti sumagmamano a negosiante ti sitwasion tapno ipangina ti presio ti face mask gapu iti ngumatngato a demand.
Inlawlawag ti DOH a ti pagilian ket makapadpadas iti flu season ngem awan ti outbreak ti sakit.
Nupay kasta, kinunada nga asino man ket mabalin nga agisuot iti face mask kas panagannad ken mandatory laeng iti uneg ti ospital tapno masalwadan ti bagida ken dagiti ay-ayatenda iti biag manipud kadagiti sakit.
