VIGAN CITY – Nagyaman ni Governor Ryan Singson kenni Sen. Bong Go gapu iti tulong na iti benneg ti salun-at babaen iti MALASAKIT Center, maysa a one stop shop para kadagiti tattao nga agkasapolan iti pinansyal ken dadduma pay a serbisyo nga adda iti pakainaigan na iti salun-at.
Babaen ti MALASAKIT Center a naipasdek idiay Ilocos Sur Provincial Hospital- Gabriela Silang, saanen a masapul dagiti tattao iti mapan kadagiti naduma-duma nga opisina iti gobyerno tapnu agpatulong ken mangala kadagiti kasapulan da a dokumento iti benneg ti salun-at.
Segun kenni Singson, ti MALASAKIT center iti sungbat iti kasapulan dagiti umili para iti simple ken napartak a pannakaiproseso iti kasapulan da iti benneg ti salun-at, nangruna dagiti dokumento ken tulong a masapul da nu adda iti pasyente da iti ospital.
Lima a milyon a pisos iti nailatang a pondo para iti operasyon ti MALASAKIT center ditoy probinsiya.
Saan laeng a ti senador iti pinagyamanan iti gobernador, nu di ket, pati dagiti ahensya a nagkikinnammayet para iti pannakaipatungpal iti nasao a proyekto kas ti Philippine Charity Sweepstakes Office, Department of Social Welfare and Development, Philippine Amusement and Gaming Corporation, Philippine Health Insurance Corporation, Office of the President, Office of the Special Assistant to the President, ken ti Department of Health.
Innallukoy ti gobernador dagiti doktor, nurses, ken empleyado ti ospital nga itultuloy da iti panangited iti napintas a serbisyo kadagiti umili.
