Namnamaen iti publiko ti agtultuloy a panagpartuat iti gobierno iti agduduma nga opurtunidad para iti trabaho ken pagsapulan dagiti Pilipino.
Ti addang ket kalpasan a ngimmato ti 96.2% nga employment rate wenno lebel dagiti Pilipino nga addaan ti trabaho idi Pebrero manipod iti 95.7% idi Enero.
Segun ken ni Palace Press Officer Claire Castro, pammaneknek ti panagpangato ti employment rate iti napintas a panangidaulo ti gobierno tapno maikkan ti gundaway dagiti Pilipino nga agtrabaho ken makasapul.
Sinigurado iti Malakanyang nga agtultuloy dagiti programa ken panaglukat iti opurtunidad kangrunaan kadagiti benepisyaryo ti Pantawid Pamilyang Pilipino Program (4Ps) ken dadduma pay a naririgat a sektor.
Iti listaan ti Philippine Statistics Authority, bimmaba ti 3.8% ti unemployment rate wenno lebel dagiti awan ti trabahona idi Pebrero manipod iti 4.3% idi Enero.
Kasta pay ti underemployment rate wenno addaan ti trabaho ngem saan nga umdas ti sapulda manipod iti 13.3% ket bimmaba iti 10.1%.
