Impaganetget ti Malakanyang a seryoso a panagpangta iti biag ni Pres. Ferdinand Marcos Jr. kalpasan a nadakamat kadagiti sarita da Davao City Mayor Sebastian “Baste” Duterte ken Vice President Sara Duterte.
Segun ken ni Palace Press Officer Usec. Claire Castro, saanen a baro iti presidente iti nasao a pangta ken ammona nga agtataud dayta iti pamilia Duterte.
Impaganetget ni Castro nga obligasyon dagiti maseknan nga ahensia a siguradoen ti seguridad ti presidente ken mangisayangkat iti nainget nga imbestigasyon.
Kinunana a saan a rumbeng nga ibilang nga angaw iti patangan ta biag ti presidente iti maibagbaga.
Kabayatanna, kinuna ni Castro nga agtultuloy iti panangpainget dagiti maseknan nga ahensia iti seguridad ti presidente gapu kadagiti maaw-awatna a pangta iti biagna ken tapno masigurado ti kinatalgedna.
