Nakipagrikna ni Palace Press Officer Atty. Claire Castro iti ipupusay ni dati a Department of Public Works and Highways Usec Maria Catalina Cabral a mapapati a natinnag manipud iti Ilog Bued, Tuba, Benguet.
Segun ken ni Castro, makapaliday ti pasamak ta mamati ti Malakanyang nga adu ti ammo ni Cabral iti flood control scam.
Ikararaganna laengen ti kararua ni Castro ken mangnamnama a dagiti dadduma pay a karaman iti panagkupit iti pondo ti pagilian ket saandan a parigaten ti gobierno.
Kinuna pay ni Castro a no pinanunot ni Cabral a kettelen ti bukodna a biag ket sayang ti 30 a tawenna a nagserbi kas civil engineer iti DPWH.
Masapul pay met a maimbestigaran a nasayaat ti drayber ni Cabral ta duada laeng a napan idiay Baguio City tapno maammuan no ania ti pudno a napasamak iti dati nga opisial.
