Nakasagana ti Malakanyang a mangilatang ti nayon a pondo tapno mapapigsa ti seguridad dagiti pampubliko a pagadalan.
Dayta ket tapno masigurado ti kinatalged dagiti estudyante ken kameng ti pagadalan ken maliklikan a maulit ti insidente iti pammaltog a napasamak iti San Jose National High School idiay Tacloban City.
Segun ken ni Palace Press Officer Claire Castro, maadal ti nayon a budget para iti gakat iti ad-adu a wll-trained security guards ken dadduma pay nga addang tapno masigurado ti kinatalged dagiti agad-adal.
Immunan a pinasingkedan ti Philippine National Police (PNP) nga imbilinen ni Pres. Ferdinand Marcos Jr. ti panangsimpa iti maipatpatungpal a polisiya iti seguridad dagiti pagadalan.
Inrekomendar pay ti PNP a maysa wenno dua a gate laeng ti malukatan iti pagadalan tapno mapapigsa ti seguridad ken naurnos a makontrol ti panagserrek ken panagruar dagiti tattao iti uneg ti pagadalan.
