Nasken a maimbestigaran ti mapapati a 1,183 a pammapatay nga adda pakainaiganna iti iligal a droga iti salinong ti agdama nga administrasion.
Sungbat dayta ni Palace Press Officer Atty. Claire Castro iti nairuar a report ti “Dahad Project” a nakaibagaan nga adda dagiti napapatay gapu iti mapapati nga iligal a droga.
Segun ken ni Castro, no adda dagiti ebidensia ket nasken a maimbestigaranen ta saan a kayat ni Presidente Ferdinand Marcos Jr a malaokan ti administrasionna kadagiti pammapatay.
Innayon ni Castro a saanen a kasapulan nga ibilin pay laeng ti Presidente ta trabaho dagiti pannakabagi ti linteg ti agimbestigar ken mangdusa kadagiti nasken a madusa.
Inlawlawag pay ti opisial a saan a kayat ni Marcos nga extrajudicial killings ti ipatawidna, no di ket kayatna ket masurot ti due process.
