Binallaagan ti Malakanyang dagiti grupo nga agplamplano nga agiwaras iti disinformation babaen iti AI mainaig iti naituding a State of the Nation Address ni Presidente Ferdinand Marcos Jr. inton sumaruno a bulan.
Segun ken ni Palace Press Officer Atty. Claire Castro, binilinen ti presidente ti Department of Information and Communications Technology (DICT) nga idaulwan ti panangbukel iti regular a policy recommendations nga agserbi a taray iti panagaramat iti AI ditoy pagilian.
Kagiddan ti umadanin a SONA ti presidente, saan nga ik-ikkaten ti Malakanyang ti posibilidad nga aramaten dagiti anti-government group ti AI ti propaganda da tapno agiwaras iti fake news ken disinformation.
Nagpanawagan ni Castro iti publiko ken iti media a tumulong iti kampanya kontra fake news tapno malapdan dagiti agiwarwaras iti saan a husto nga impormasyon.
