Kinontra ti Malakanyang ti kinuna ti kampo ni dati a Presidente Rodrigo Duterte nga epekto ti pannakakemmeg iti dati a presidente ti nagbalin a resulta ti midterm elections.
Maibasar ngamin iti dati a Chief Legal Counsel Salvador Panelo, ti resulta ti eleksyon ket ipaspasimudaagna ti protest vote kontra iti administrasyon ni President Ferdinand Marcos Jr.
Pinasingkedan ni Senador Ronald ‘Bato’ Dela Rosa a ti nangato a botos a nagun-odna ket botos ti panagprotesta wenno panagtignay kadagiti umili a naagrabyado iti nagbanagan ni Duterte.
Ngem segun ken ni Palace Press Officer Claire Castro, saan a nasken nga iraman ti naakusaran a nagaramid iti madi tapno laeng makalisi iti madakdakamat a protest vote.
Dagiti umili ti nanghusgar kadagiti kandidato isu a nasken laeng a marespeto ken awan ti ania man nga epekto ti ibagbaga ti kampo ti dati a presidente.
