Inallukoy ti Malakanyang dagiti mangpabpabasol ken ni President Ferdinand Marcos Jr. a mangidatag ti ebidensya ken saan a puro alegasyon laeng.
Dayta ket kasaruno iti testimonya iti Senado ni Bernard Tube, a nagpayammo a dati marine ken mapapati a dati empleado ni Zaldy Co.
Segun ken ni Tube, naminsan isunan a karaman iti panagipatulod kadagiti maleta nga adda linaona a kuarta iti pagtaengan ti presidente idiay Ilocos Norte.
Kinuna ni Palace Press Officer ken PCO Undersecretary Claire Castro a saan nga umdas dagiti pammabasol no awan met iti maipakita a natibker a pammaneknek.
Impaganetget ni Castro a nadaras iti agpabasol kangrunaan no ti gagem ket dadaelen wenno riribuken iti gobierno.
Gapu dyata ket inallukoyna dagiti agir-iruar ti alegasyon a mangipasa kadagiti dokumento ken dadduma pay a kongkreto nga ebidensya tapno mapaneknekan iti ibagbagada.
