Indeklarar ti Malacañang ti April 2, 2025 nga special non-working day idiay Bataan kas panangrambak iti birth anniversary ni Francisco “Balagtas” Baltazar a maysa a Filipino poet ken orator.
Segun ti Malakanyang, maikkan iti gundaway dagiti umili idiay Bataan tapno lagipen ti kinapateg a kontribusyon ni Francisco “Balagtas” Baltazar kadagiti Pilipino babaen ti panangiruarda ti Proclamation 830.
Naipasngay ni Baltazar idiay Bigaa, Bulacan idi April 2, 1788 ken immakar idiay Orion, Bataan idi 1840 a nagnaedannan kaduana ti asawana a ni Juana Tiambeng agingga pimmusayen idi 1862.
Nalatak iti daniwna a “Florante at Laura” a maisursuro kadagiti high school students.
Kabayatanna, inruar pay iti Malakanyang ti Proclamations 827, 828 ken 829 a mangidekdeklarar nga special non-working days idiay Baco, Oriental Mindoro inton March 19 gapu iti panagrambak ti Banana Festival, Binangonan idiay Rizal gapu iti maika-125 founding anniversary iti ili inton March 29, ken Tanjay City idiay Negros Oriental kas panangrambak ti Charter anniversary inton April 1.
Ti nasao a proklamasyon ket pinirmaan ni Executive Secretary Lucas Bersamin idi March 13.
