Impasigurado ti Malakanyang a bantayan ni Presidente Ferdinand Marcos Jr. ti panagaramat iti pondo a mailatang kadagiti evacuation center tapno saanen nga agbanag iti ghost project.
Segun ken ni Palace Press Officer Claire Castro, adda dagiti mekanismo ti gobierno tapno mabantayan no maipatpatungpal dagiti proyekto a pinondoan ti gobierno.
Kunana a saan a kayat ti presidente a maulit dagiti ghost project a nagbalin a parikut kadagiti naglabas nga administrasion ken iti agdama a gobierno.
Iti salinong ti Ligtas Pinoy Centers Act, ang National Disaster Risk Reduction and Management Council (NDRRMC), karaman dagiti lokal a gobierno ken dadduma pay nga ahensia a mangkita kadagiti lugar a maipangruna iti panangipatakder iti evacuation center.
Ti Department of Public Works and Highways ti agserbi nga implementing agency.
Maibasar iti proposed 2027 national budget, dua a Ligtas Pinoy Center ti nailatang iti kada rehion, nga adda pondona a P90 milion iti tunggal maysa.
