Impaganetget ti Malakanyang a pork-barrel free ti 2026 national budget ken saan a mapalubosan a makibiang dagiti pulitiko iti panagaramat ti pondo iti gobierno.
Segun ken ni Executive Secretary Ralph Recto, nalawag iti linteg a maiparit dagiti agpampanday linteg a makiraman iti implementasyon ti budget kangrunaan iti panagiwaras ti ayuda ken dadduma pay a tulong pinansyal.
Kadagiti farm-to-market roads, kinuna ni Recto a ti Department of Agriculture ti nangitunding kadagiti proyekto a mapondoan, ket saan a dagiti pulitiko.
Inlawlawagna a ti Presidential Assistance to Farmers ket karamanen iti gakat a budget iti Malakanyang ken gagem a suportaran ti presyo iti irik tapno mapalaka ti presyo iti bagas.
Karitna pay kadagiti angdudua nga urayen ken padasenda pay ti 2026 budget sakbay a babalawen ta nalawag ti gagemda a leppasen ti pork ken patronage politics.
