Awan pay ti kaso ken warrant of arrest ni dati a Department of Public Works and Highways Secretary Manuel Bonoan isu a saan a mapilit nga agawid ditoy pagilian.
Dayta ti pinasingkedan ni Palace Press Officer Atty. Claire Castro kasaruno dagiti saan a husto nga impormasyon a naited ken ni Presidente Ferdinand Marcos Jr. mainaig iti flood control projects a napnuan iti anomalya.
Segun ken ni Castro, mapaawid laeng ni Bonoan no adda kasona, warrant of arrest ken no nakanselar ti pasaportena ta maibilangton a pugante.
Iti agdama, kinuna ni Castro nga awan ti maaramidan ti gobierno ken saanda a mapilit nga agsubli ditoy pagilian ta adda karbenganna iti maawagan a “freedom of movement”.
Maipalagip a napan idiay Amerika ni Bonoan tapno kuyogen nga agpaagas ti asawana ngem saanen a nagsubli idi December 17, 2025 nga isu koma ti petsa nga agawid ditoy pagilian.
