Awan ti kanunongan nga opinion ti Malakanyang mainaig iti nagbalin a decision ti Korte Suprema nga ibasura ti motion for reconsideration ti kamara mainaig iti impeachment ni Vice President Sara Duterte.
Kasaruno daytoy ti panangkontra dagiti sumagmamano a kongresista ken uray ni Senate President Vicente Sotto III a kasla nagbalin a judicial legislation ti napasamak iti reklamo nga impeachment iti bise presidente.
Segun ken ni Palace Press Officer Atty. Claire Castro, no ti pagarup ti dadduma ket saan a husto ti nagbalin a decision ti Supreme Court, iti met biang ti Malakanyang, suroten ken idayaw no ania ti desision ti kangatoan a korte.
Indeklara ti Korte Suprema nga unconstitutional ti Articles of Impeachment kontra ken ni VP Sara ngem saanna kayat a sawen a naabsuelton uray no na-dismiss ti reklamo nga impeachment gapu iti technicality.
