VIGAN CITY – Natalgeden ti kasasaad ti kayanak a maladaga a nakita iti abandonado a paset idiay Brgy. Casili, Sto. Domingo kalpasan a naipan ti Rural Health Unit iti nasao nga ili para iti pannakakidalanna ti eksaminasyon.
Impakammo ni Judeth Balmaceda, agtawen ti duapulo ket dua, balasang nga agnaed idiay Pantay Fatima, Vigan City kadagiti pannakabagi ti linteg iti Sto. Domingo Municipal Police Station a nasarakanda ti kayanak a lalaki a maladaga iti karuotan a paset iti municipal road a sakupen ti Brgy, Casili, Sto. Domingo.
Maibasar ti pakpaka-una nga imbestigasyon, kabayatan ti pannagna da Balmaceda ket nakanggegda iti uni isu a sinapulda ket nasarakanda ti maladaga a nasupot ti yellow plastic bag isu nga innalana nga impan iti RHU.
Pinasingkedan met ti ina ni Judeth a ni Carmen Balmaceda a nakasagana a dumalan ti proseso tapno agbalin nga adopted-child na ti nasao a maladaga ta patienna a sagut kadakuada ti Namarsua.
Manipod ti RHU a nakaipanan ti maladaga ket maiyakar idiay Lahos Clinic and Hospital para iti naan-anay a pannaka-obserbarna.
Kabayatanna, agtultuloy ti imbestigasyon dagiti pannakabagi ti linteg iti panangtakuat ti adda iti likodan ti panangibati ti maladaga ta araramidenda amin a kabaelanda ket impasigurado ni PSSG. Maximo Ramos iti Sto. Domingo PNP a sumango ti kaso a panaglabsing ti RA 7610 wenno Abandoning of Child ti akin-aramid dayta. (Updated)
