VIGAN CITY – Im-imbestigaran pay laeng dagiti kameng ti Gregorio Del Pilar municipal police station nu siasino ti akin-anak iti maladaga a lalaki a nakali ken nasarakan dagiti ubbing idiay Alfonso, Gregorio del Pilar idi December 30.
Segun ken ni Police Senior Master Sergeant Abelardo Balbin, chief investigator ti Gregio del Pilar PNP, nakikammayetdan iti Rural Health Unit ti ili ta isuda iti akin-iggem ti rekord dagiti amin a masikog a babbai iti ili ta nalaklaka a ma-trace nu siasino iti posible nga akin-anak ti maladaga ngem awan pay laeng iti nakita da iti listaan nga eksakto iti bulan ti maladaga.
Nu pay kasta, inpasigurado ni Balbin nga inton agsublin ton iti opisina dagiti empleyado iti gobiyerno ket mapan danto iti kabangibang a Rural Health Unit tapnu agsaludsod da kas paset iti imbestigasyon iti pasamak.
Adda dagiti ubbing a napan nagpictu-picture idiay Barangay Alfonso ket nadlaw da nga adda iti nalaylay a root ken adda nagaburan isu a kinalida ket nakitada iti karton ti TV a nalangsi ti angot na isu a saan dan nga intuloy a linukatan ngem napan da ken ni Melba Biteng nga isu iti nangitawag iti police station inaig iti nakita dagiti ubbing.
