Kinontra ti Malakanyang ti dinakamat ni Vice President Sara Duterte nga agat-arak ni Presidente Ferdinand Marcos Jr idi inawatna ti resignation-na kas mangidaulo iti Department of Education.
Segun ken ni Palace Press Officer Claire Castro, nalawag nga awan kinaagpayso dagiti pammabasul ni VP Sara, ket paset laeng iti propagandana tapno dadaelen ti presidente.
Kinuna ni Castro a pammaneknek ti nasapa a panagriing ni Presidente Marcos para kadagiti event ken napapateg a taripnong a mangipakita iti napasnek a panagtrabahona.
Saan a kas kadagiti dadduma a lider nga aldawen nga agriing ken rason pay ti panagpuyat ti media ta kasapulanda ti aguray iti nabayag para iti coverage wenno sumangpet iti alas kuatro singkwenta iti malem iti SONA venue uray alas kuatro iti malem ti naituding nga oras.
