Namnamaen ti Malakanyang a dagus a maipasa ti Kongreso ti gakat para iti emergency power ni Presidente Ferdinand Marcos Jr tapno maipatungpal daytoy sakbay ti Semana Santa.
Segun ken ni Palace Press Officer Atty. Claire Castro, addan iti Kongreso ti bola no kasano kapardas a tignayan dagiti agpampanday-linteg ti gakat a mangted turay iti presidente nga ikkaten wenno kissayan ti excise tax tapno mapalag-anan ti publiko iti epekto ti riribuk idiay Middle East.
Mainaig met iti kiddaw dagiti transport group nga ibasura ti oil deregulation law ken 12 percent VAT iti langis, kinuna ni Castro a saan pay a napagpatangan daytoy iti Malakanyang.
Ti pokus ita ti Presidente ket mapalag-an ti rigat ti publiko iti epekto ti nangina a presio ti produkto-petrolyo.
