Kinontra ti Malakanyang ti panangibaga ti PDP-Laban nga ar-aramaten ti administrasion ti patangan iti International Criminal Court tapno ilisi iti imatang ti publiko manipud iti isyu ti korapsion.
Segun ken ni Palace Press Officer Claire Castro, awan ti pagibasaran ti pammabasul ta nabayagen a naipila ti kaso iti ICC, sakbay pay a nagtakem ni Presidente Ferdinand Marcos Jr.
Innayon ni Castro a saan a kontrolado ti gobierno ti proseso ti ICC isu a saan a nasken nga ipabasul iti administrasion ti pannakairaman da Senador Bato dela Rosa ken ni Senador Bong Go iti kaso mainaig iti war on drugs ti naglabas nga administrasion.
Idi pay laeng ket kinuna ni Castro nga addan dagiti damag iti mapapati a pagkurangan kadagiti sumagmamano nga operasion kontra droga, agraman ti kapaliiwan ni Baguio City Mayor Benjamin Magalong nga adda madi kadagiti dadduma nga addang.
