Impasigurado ti Malakanyang a nakasagana ti gobierno iti posible nga epekto ti panangrugi iti nabara a panawen kasaruno ti nairekord a nangato a heat index kadagiti sumagmamano a lugar iti pagilian.
Segun ken ni Palace Press Officer Usec Claire Castro, agtultuloy ti panangkolekta ken panangsimpa ti Malakanyang kadagiti action plan wenno plano iti manamnama nga epekto ti panangrugi ti kalgaw.
Kunana a nasaysayaat no suroten pay laeng ti publiko ti balakad ti Department of Health tapno maliklikan ti aniaman a parikut nga itunda ti nabara a panawen.
Iti agdama, awan pay ti makitkita ti gobierno a potensyal nga epekto iti ekonomia ken iti sektor ti agrikultura ti panangrugi ti nabara a panawen, ngem impasiguradoda a nakasagana ti gobierno.
Ita nga aldaw, adda dagiti siudad a nangsuspenso iti face-to-face classes da gapu iti nangato a heat index.
