Nagpanawagan ti Malakanyang iti Overseas Filipino Workers (OFW) a saan nga iraman ti ekonomia ken ti pamiliada iti patangan ti politika.
Dayta ket iti baet ti plano dagiti OFW idiay Europa a mangirusat ti Zero Remittance Week wenno saan a panagpatulod ti remittance manipod March 28 agingga April 4, 2025.
Segun ken ni Palace Press Officer Claire Castro, saan laeng a gobierno ta uray pamilia dagiti OFW ket mairamraman nu maituloy ti kampania.
Impaganetgetna a sumursurot laeng iti gobierno iti maipatpatungpal a linteg ken dagiti kaso a naipila kontra ken ni dati a President Rodrigo Duterte.
Gagem ti Mausig Croatia nga ipanawagan nga isubli ni Duterte iti pagilian babaen ti temporaryo a panagpasardeng ti panagpatulod iti kuarta iti pagilian.
Impanawagan pay ni Castro kadagiti OFW nga agkalma ken agbalin a patas iti panagtignay iti nasao a patangan.
