VIGAN CITY – Matuloy ita nga aldaw iti panaglukat ti klase para ti School Year 2022-2023 iti dadduma a pagadalan idiay Abra ta adda iti makeshift classroom.
Iti pannaki-uman ti Bombo Radyo Vigan ken ni La Paz, Abra Mayor JB Bernos, adda dagiti pagadalan a mabalin ken natalged nga aramaten dagiti estudyante ngem adda met dagiti naideklarar a saanen a mabalin a maaramat gapu iti pannakaapektarna iti ginggined idi napalabas a bulan.
Segun ken ni Mayor Bernos, adda dagiti naipatakder a temporary learning facility para kadagiti agad-adal ta maysa iti Malabbaga Elementary School iti saan a mabalin nga aramaten ngem inyunay-unayna a masapul nga agtitinnulongda para iti naannayas a panaglukat ti klase.
Kiddaw ti La Paz Local Government Unit nga ikonsiderar iti Department of Education nga ikkanda ti gundaway a simpaen pay dagiti pagadalan tapno nataltalged dagiti estudyante iti panagadalda ken dagiti LGU iti kangrunaan a pagkamangan dagiti opisyal ti barangay ken dagiti mangisursuro kadagiti pagadalan.
