Ipangpangruna ti Bureau of Fisheries and Aquatic Resources (BFAR) dagiti addang a mangtaming iti bumasbassit a makalkalap dagiti mangngalap idiay West Philippine Sea (WPS).
Kasaruno daytoy ti report ti Philippine Statistics Authority (PSA) a bimmaba iti 101,000 Metric tons ti nakalap nga ikan idiay West Philippine Sea iti umuna nga innem a bulan ti 2024 no iyarig iti napalabas a tawen.
Inamin ti BFAR a maysa kadagiti makaapektar ket ti agtultuloy a tension iti WPS.
Plano itan ti ahensia a palawaen ti monitoring, control, ken surveillance kadagiti kabaybayan ti pagilian, pakairamanan ti West Philippine Sea.
Segun ken ni BFAR Spokesperson Nazario Briguera, adda ₱1.5 bilion a pondo a nairanta para iti panaggatang kadagiti kanayonan a floating assets a pakairamanan ti 50-meter steel-hulled multi-mission offshore vessel ken 80-meter steel-hulled multi-purpose refrigerated cargo vessel.
Gumatang pay ti BFAR ti nayon nga assets a paset ti programa ti “LAYAG West Philippine Sea” tapno umado dagiti makalap nga ikan iti nasao a kabaybayan.
