Madanagan ti Makabayan Bloc kadagiti addang ti Senado ken ti Duterte camp iti impeachment trial ni Vice President Sara Duterte.
Dayta ket kalpasan a nagkiddaw ti kampo ni Duterte a madismiss ti kaso idinto a ni Senate President Chiz Escudero ket kunana a mabalin a mawaswas babaen iti vote of majority.
Iti pannaki-uman ti Bombo Radyo Vigan ken ni Rep. France Castro, ‘unconstitutional’ ti kinuna ti Senate President ta ti laeng mabalin nga addang iti nasao nga impeachment trial ket ‘acquit’ ken ‘convict’ isu a kasapulan a dumalan iti trial.
Nadismaya ti Makabayan Bloc gapu ta kasla saan pay a nakasagana ti Senado a mangdengngeg iti kaso ngem namnamaenda a saanton a maitantan no sumrek ti 20th Congress ta napaot unayen ti panagur-uray dagiti umili.
Impaganetget pay ti kongresista ti nasken a panagbalin nga impartial dagiti senator-judge iti trial ken namnamaenna a makitinnulong kadakuada ni VP Sara.
