VIGAN CITY – Mapatta-patta nga inton Biernes idiay Arizona, USA a malpas ti binnilangan ti botos a naur-or da Republican President Donald Trump ken ni Democratic Presidential candidate Joe Biden.
Iti pannaki-uman ti Bombo Radyo Vigan ken ni Bombo International Correspondent Roi Dennis Adela Cayetano-Smallwood iti Scottsdale, Arizona, uppat a gasut a ribo a mail in ballots pay ti kasapulan a mabilang sakbay a maideklrar no siasino ti nangabak iti nagbaetan dagiti dua a kandidato partikular iti paset ti Phoenix nga isu ti kaaduan iti populasyon.
Inlawlawag ni Smallwood a nabayagan ti pannakaideklarar idiay Arizona no siasino ti nangabak iti kinapresidente ket gapu ta iti tunggal estado ket adda ti nadumaduma a proseso.
Idiay Arizona ket yun-unada a bilangen dagiti botos iti aldaw ti eleksion, sumaruno dagiti nagbotos para iti early voting ken maudi iti mail-in voting.
Kabayatanna, pinasingkedan ni Smallwood nga idiay Pennsylvania ket adda pay ti maysa a milion a mail-in ballots a mabilbilang pay laeng idinto nga agraraira latta iti protesta idiay Arizona gapu iti manarimaan nga eleksion.
