VIGAN CITY – Naimaldit ti maikawalo a kaso ti COVID19 ditoy probinsia a maysa a lalaki, agtawen ti uppat a pulo ket innem nga agnaed idiay Patpata Segundo, Candon City a kadua ti maikapito a pasyente nga agitultulod kadagiti returning Overseas Filipino Workers iti intero a Luzon.
Dagiti lugar a napanan ti pasyente ket ti Ilocos Norte, Ilocos Sur, La Union, Pangasinan, Bicol ken National Capital Region ket nakapulapolna dagiti katrabahoanna, pamilia ken dagiti OFW nga intultulodna.
Ni IS-C8 ket asymptomatic ngem na-isolate ken naidalan iti swab testing kas resulta iti panang-contact tracing da iti maikapito a pasyente.
Agtalinaed iti isolation ti Ilocos Sur District Hospital – Narvacan agingga inton agnegatibo dagiti dumalananna pay a test.
Gapu iti dayta, napagdesisyonan ti Provincial COVID Task Force ken ti City Government ti Candon nga ibilang kas Critical zone dagiti lugar a naidalan iti Enhanced Community Quarantine, Containment zone iti Modified Enhanced Community Quarantine ken ti intero a barangay a naidalan iti Community Quarantine kas Buffer Zone agingga inton July 30.
