Babaen iti limapulo ket uppat a botos dagiti miembro ti House Committee on Justice ket nakitaan ti maikatlo ken maikapat nga impeachment complaint kontra ken ni Vice President Sara Duterte ket sufficient in substance, nga umdas tapno aggaraw para iti sumaruno a panagdenggeg.
Kalpasan ti panagbotos ket kinuna ni Batangas Rep. Gerville Luistro nga adda sangapulo nga aldaw ti kampo ni Duterte tapno sungbatan ken tignayan dagiti alegasyon a nakaipauneg iti impeachment complaint.
Iti umuna nga aldaw iti panagdenggeg ket nadetermina ti komite ti sufficiency in form iti nabati a dua a reklamo kalpasan a nai-withdraw iti immuna ken naibasura iti maikadua a naipila nga impeachment iti Makabayan Bloc.
Iti maikatlo a reklamo ket impila ni Fr. Jose Saballa nga inyendorso met ni Mamamayang Liberal Party-list Rep. Leila de Lima, a mangak-akusar ken ni VP Sara iti panagabuso iti mapapati a panagaramat iti confidential funds, panagipasa iti kwestyunable a liquidation documents ken korapsyon a napasamak bayat nga isu ti secretary iti Department of Education.
Karaman pay iti alegasyon iti panangpangta ti bise presidente iti mapapati a panangpapatay kada Pres. Ferdinand Marcos Jr., First Lady Liza Araneta-Marcos ken dati nga Speaker Ferdinand Martin Romualdez.
Ti maikapat nga impeachment complaint ket impila met ni Atty. Nathaniel Cabrera ken inendorso met da Manila Rep. Bienvenido Abante Jr. ken Deputy Speaker ken La Union Rep. Francisco Paolo Ortega V.
Dayta met ket gapu iti mapapati nga iregularidad ti Statements of Assets, Liabilities and Net (SALN) ni VP Sara ken dagiti panagkusing iti mapapati a pondo iti gobierno.
