VIGAN CITY – Kinumpirmaran ni Gov. Ryan Singson ti maikapito a kaso ti Covid19 ditoy probinsia a maysa a lalaki, agtawen ti tallopulo ket pito manipud ti Candon City a maysa a bus driver nga agiluglugan kadagiti Returning Overseas Filipino iti intero a Luzon.
Adda ti travel history ti pasyente iti intero a rehion kas iti Bicol, NCR, Tarlac ken Abra a ti naudi a biahena ket idi July 13-14.
Naggurigor ken naguyek idi July 15 isu a naglangan pay laeng iti trabahona ket idi July 17, nakasangpet idiay Candon City Health Office nga isu ti pannakaidalanna iti rapid testing ken nai-admit idiay Ilocos Sur District Hospital – Magsingal.
Gapu ta kumarkaro iti kasasaadna iti nagpatnag ket nayakar iti Ilocos Sur Provincial Hospital Gabriela Silang para iti naan-anay a pannakatamingna ken naamwan ti resultana idi kalman nga isu ket SARS-COV-2 positive.
Nupay kasta, insigida a nangisayangkat ti Candon City Health Office ti disinfection ken naka-home quarantinen dagiti nakapulapolna iti nasao a pasilidad.
Malaksid iti dayta, nakikammayeten ti Incident Management Team kadagiti maseknan nga ahensia idin a ti Provincial and City Epidemologic Surveillance ket mangisaysayangkaten ti contact tracing kadagiti nakapulapol ti pasyente.
