VIGAN CITY – Inallukoy iti maysa nga eksperto iti publiko a paingeten iti panagbantay kadagiti pasyente nga adda dengue na iti maikapat agingga maikanem nga aldaw iti panagsakit da.
Inlawlawag ni dati a Health Undersecretary ken agdama a Deputy Secretary General ti Center for Health ti Red Cross Dr. Susan Mercado nga aggurigor dagiti dengue patients iti umuna agingga maikatlo nga aldaw iti panagsakit da ti dengue agingga a rumuwar dagiti rashes iti maikatlo agingga maikapat nga aldaw.
Ngem iti maikapat agingga maikanem nga aldaw ket bumaba iti platelet ti dengue patient agingga nga agpadara wennu agtinnag a hemorraghic ti sagabaen na a klase ti dengue isu a delikado ken masapul a mabantayan ida.
Kinunana, masapul a siguradoen a hydrated dagiti dengue patients babaen iti panangpainom kadakuada iti adu a danum ken panangpakan kadagiti taraon nga adu ti digo na.
