Vigan City – Kinumpirmaran ni Governor Ryan Singson iti maikapat a kaso iti covid-19 ditoy probinsia kas maibasar iti post iti official page-na.
Ti IS-C4 ket agtawen ti tallo pulo ket uppat a lalaki a maibilang nga APOR a napan idiay Manila idi May 31 agingga June 13 ket iti panagsublina, naisayangkat iti Oropharyngeal and Nasopharyngeal Swabs iti Capitol Medical Center idiay Quezon City ket nakaawid ti pasyente idi June 14 iti Narvacan ket nag-home quarantine idiay Barangay Quinarayan.
Naawat ti PGIS Action Center iti opisyal a resulta iti swab test ti pasyente idi alas singko kwarenta itattay malem a nakakitaan iti SARS CoV-2.
Kalpasan iti pannakikammayet iti LGU, ket napagtutulagan a ti Barangay Quinarayan, Narvacan ket maidalan iti Extreme Enhanced Community Quarantine manipod June 17 agingga July 1 wenno maipakammonto.
No pay kasta ket manarimaanen iti contact tracing iti Municipal ken Provincial Level inaig iti nakapulapol ti pasyente.
Inyunay-unay ti gobernador nga agbalin a palagip iti dayta a napasamak nga awan iti pilpilien iti impeksyon isu a rumbeng nga agtalinaed iti uneg iti pagtaengan ta responsibilidad ti kinatalged iti tunggal maysa ta saan pay a nalpas iti laban kontra covid-19.
