VIGAN CITY – Nakemmeg ni Jaime Tuzon Valencia Jr., agtawen tallo pulo ket tallo, naasawaan, Top 10 Provincial Level Rank No. 5, maysa a tricycle driver nga agnaed idiay Barangay Apatot, San Esteban iti naiwayat nga anti-illegal drug operation iti nasao a barangay.
Segun kenni Police Major Marcelo Martinez Jr, hepe ti San Esteban Municipal Police Station, sakbay iti panangisayangkatda iti operasyon ket nabayag a sinip-siputan da ni Valencia ta datin a drug surrenderree ken adda pay kabsatna a naibalud gapu met laeng iti isyu iti iligal a droga.
Napaneknekan dagiti otoridad nga adu iti koneksyon ti suspek nu iligal a droga iti mapagpapatangan isu a nailista kas maikalima iti provincial level.
Naala kenkuana ti maysa a bassit a plastic heat sealed sachet a naglaon iti mapapati a shabu a nagserbi a buy-bust item; tallo a babassit a heat sealed plastic sachet ti shabu; maysa a medium size heat sealed plastic sachet a naglaon ti shabu; maysa a medium size plastic a naglaon ti dua a babasit a plastic sachet nga adda ti straw na ken maysa a pakete ti heat sealed biscuit wrapper a naglaon iti mapapati a napagango a bulong ti marijuana nga agdagsen ti 10.5 grams ken aggatad ti PHP 6,500, sabali laeng ti lima gasut a pisos a nagserbi a buy-bust money.
Ti agdama, nakaibaluden ti suspek idiay San Esteban municipal police station ta maiyur-uray iti pannakaipila iti kaso kontra kenkuana.
