VIGAN CITY – Pinasingkedan ni Police Captain Leonilo Ancheta, hepe ti Bantay municipal police station nga idiay Barangay San Isidro, Bantay a nakemmeg ni Marcelo Brazil Constantino alyas Mar nga agtawen iti lima pulo ken tubo ti Barangay Bulo, Alacapan, Cagayan idi alas tres iti malem idi June 20.
Segun ken ni Ancheta, naglemmeng ti suspek iti nakaikamangan ti putot na idiay San Isidro nga isu iti nakaranaan dagiti otoridad kenkuana ta naamuan a ti suspek ket saan unay nga agbaybayag iti lugar a pappapanan na ta kanayon nga agalis-alis.
Ti suspek ket maikadua iti listaan dagiti most wanted person ti probinsiya ti Cagayan gapu iti kaso na a murder.
Ti pannakakemmeg na ket babaen iti warrant of arrest kontra kenkuana a naiparuwar idi September 11, 2017 iti sala ni Judge Francisco Donato, Regional Trial Court Branch 33, Ballesteros, Cagayan.
Kinunana, idi nakemmeg ti suspek ket insigida nga inpaima ti Bantay PNP kadagiti kameng ti Regional Intelligence Branch ti Region 2 PNP.
