Innaganan ni Pope Francis ti Sanctuary of Our Lady of the Assumption Church iti ili ti Sta. Maria, Ilocos Sur kas Minor Basilica.
Daytoy ti maikadua a minor basilica iti probinsia kalpasan a maideklarar idi February 16, 2022 ti simbaan ti St. Nicolas de Tolentino and Shrine of Sto. Cristo Milagroso de Sinait.
Iti pannaki-uman ti Bombo Radyo Vigan ken ni Fr. Ernie Juarez, Parish Priest ti Our Lady of the Assumption Church, maragsakan iti panagbalin a basilica ti simbaan ta nabayagda daytoyen nga inur-uray.
Innayonna a dakkel a banag daytoy para iti Archdiocese ken iti Simbaan Katolika tapno maital-o ti social justice kadagiti deboto.
Maangay ti solemn eucharistic declaration inton August 15, 2025, aldaw ti kapiestaan ti Our Lady of the Assumption.
Nangipatuloden iti imbitasyon ni Vicar General Msgr. Sammy Rosimo ken ni Papal Nuncio Charles Brown pakairamanan dagiti cardinal ken obispo iti pagilian tapno idaulwandanto ti nakaituding a seremonya.
