VIGAN CITY – Nauram ti maikadua a kadsaaran iti pagtaengan ni Domingo Querido Hortizuela, agtawen iti limapulo ket uppat, welder, ken agnaed iti Barangay Angkileng, Sta. Lucia.
Iti pannaki-uman ti Bombo Radyo Vigan ken ni Senior Fire Officer 4 Romeo Cadiz nga Acting Municipal Fire Marshal iti Sta. Lucia, naammoan a ti mismo akin-kukua iti nakapansin iti uram gapu kadagiti nagtinnag a debris manipud iti maikadua a kadsaaran isu a nagreport kadagiti pannakabagi ti linteg.
Awan ti nadangran iti pannakauram iti pagtaengan ta nairana nga adda iti ground floor ti akin-kukua idi napasamak iti insidente.
Iti agdama ket agtultuloy latta iti imbestigasyon inaig iti nagtaudan iti uram ken no mano iti gatad iti nadadael gapu iti nasao a pasamak.
Kabayatanna, balakadna kadagiti umili a pumanaw kadagiti pagtaenganda nga iddepen ti breaker tapno maliklikan ti aniaman nga insidente.
