Vigan City – Adda manen iti baro a kaso iti covid-19 ditoy probinsia kas kinumpirmaran ni Governor Ryan Singson nga isu iti maika-innem a kaso iti nasao a sakit.
Maysa a kameng iti Philippine National Police nga agtawen ti lima pulo ti nasao a pasyente nga addaan iti napalabas a history-na iti covid-19 infection a nalaingan iti napalabas a tallo bulan.
Naaddaan iti official business idiay National Capital Region idi July 6 agingga July 9 ket nakaawid iti probinsia idi July 10 ket nai-quarantine idiay Camp President Elpidio Quirino, Bulag Bantay kaduana dagiti lima nga Uniformed Personnel.
Ti IS-C6 ket asymptomatic ken agdama a naka-isolate iti ISPHGS idinto a dagiti mapapati a close contact-na ket naidalanen iti swab testing ket mayururayen iti resulta ken manarimaan iti pannaka-isolate-da.
Agtultuloy iti contact tracing ti Provincial Epidemiology Surveillance Team kadagiti nakapulapol ti pasyente ken kiddawda iti pannakitinnulong iti umili.
Kabayatanna, ingunamgunam ti gobernador iti kinapateg iti panagsurot kadagiti pagannurutan iti social distancing, masansan a panagbuggo ken panagaramat iti face mask no adda iti publiko.
