VIGAN CITY – Saan pay a panawen iti pannakaipatungpal ti Maharlika Wealth Fund ta adu pay laeng iti paggastosan ita a gundaway kas pinasingkedan ti maysa a Political Economic Analyst.
Iti pannakipapatang ti Bombo Radyo Vigan ken ni Astro del Castillo, inlawlawagna a ti gagem ti Maharlika Fund ket agur-or iti excess wenno extra fund iti napili a government institution wenno financial institution tapno makaaramid iti pondo a pag-invest ket padakkelen ken maaddaan ti napintas a sapul tapno maaramat kadagiti aktibidad ti ekonomia iti pagilian.
Ngem kinunana a saan a mayannatup ita a panawen ti nasao a banag ta adu pay iti rumbeng a paggastosan ta masapul iti sobra a kuarta nu ag-invest.
Segun ken ni del Castillo, nu bilang addanton ti extra fund ket isun ti panagur-or iti pondo tapno naannayas iti pannakaipatungpal ngem nasaysayaat nu tulongan laengen dagiti institusyon a papigsaen ti investmentda para iti husto a pakaipanan ti extra a kuartada.
VOICE OF ASTRO DEL CASTILLO
“Bad taste ken untimely” met ti Maharlika Fund para kadagiti mangmangged iti nasao a banag kas kinuna ni ACT Teachers Party-list Rep. France Castro ta nu adda iti surplus a baknang ken reserve iti pagilian ket mabalin nga ag-invest iti mabalin a pagsapulan iti kuarta.
Segun ken ni Castro, saan a parikot nu ag-invest tapno umado ti kuarta ngem ti parikot ket ibilangna a sugal iti investment ket pakadanaganna ta ti maaramat a pondo ket ti pension wenno dagiti private workers isu a saanna a pagtalkan ti nasao a banag.
Kiddawna a saan a rumbeng nga aramaten ti pension ket inkwestyonna a nu maabak wenno saan nga agballigi ket siasino iti mangsungbat nu adda napasamak iti pondo.
Innayonna a rumbeng nga adalen pay nga umuna iti nasao nga addang ket saan a padarasen, denggen ti ibagbaga dagiti kameng ti GSIS, SSS, negosyante ken naduma-duma a sector a mangkonkontra.
VOICE OF REP. FRANCE CASTRO
