Addan ti pamalpalatpatan dagiti pannakabagi ti linteg ti Magsingal Police Station iti napasamak a pammaltog idiay Barangay Bungro.
Nabigbig ti biktima a ni Joshua Rodiño Bañaga, agtawen iti tallopulo ket dua, collector ti San Basilio Cooperative, agnaed iti nasao a lugar idinto a saan pay a nagbigbig dagiti suspek.
Iti pannaki-uman ti Bombo Radyo Vigan ken ni Police Captain Melvin Trinidad, OIC ti Magsingal Police Station, ti trabaho ti biktima kas lending collector ken personal a parikut dagiti banag nga agtultuloy nga im-imbestigaranda tapno matakuatan no ania ti rason iti panangpapatayda kenkuana.
Naggapu iti trabahona nga agawid ti biktima babaen iti minanehona a motorsiklo idin ta pinaltugan dagiti saan a nabigbig a suspek nga adda iti likodna iti namitlo a daras babaen iti caliber 45 a paltog sa da naglibas.
Gapu dayta, nagsagaba iti tama ti paltog ti bukot ti biktima ket naitaray iti ospital ngem dead on arrival.
Nangiwayat met iti dragnet operation dagiti pannakabagi ti linteg kadagiti kabangibang a kuerpo ti pulisya para iti pannakakemmeg ti suspek.
