VIGAN CITY – Awan ti nadangran wenno casualty a nairekord kalpasan a dinayyeg ti magnitude 6 a ginggined iti amianan a daya iti Japan kangrunaan ti Fukushima region.
Iti pannaki-uman ti Bombo Radyo Vigan ken ni Bombo International News Correspondent Hannah Galvez manipod Japan, awan ti nadangran ken awan ti nadadael a pasdek kalpasan ti ginggined ta sakbay nga adda ginggined ket ag-alarm ti cellphone, radio ken tv a naikonektar iti radar.
Segun kenkuana, uray ti orasanna ket nakakonektar iti radar a gappuanan ti panaguni nu adda ginggined isu a makatignayda.
Kinunana a dakkel a tulong ti kaadda ti mamin-tallo a daras kada tawen nga earthquake drill kadagiti pagadalan ken pagopisinaan ta mapakaammoan ken nakasagana dagiti umili.
Inlawlawagna pay nga awan ti nadadael a pasdek uray napigsa ti ginggined ta kaaddoan a dadakkel a pasdek ket rubberized iti babana isu nga uray madayyeg ket saan a maan-ano.
Awan met ti naisayangkat a suspension ti klase dagiti agad-adal ta saan pay a nangrugi ti klaseda ta inton April 8 pay laeng ti panagsubli manipod bakasyon dagiti estudyante.
Kabayatanna, impasiguradona nga awan ti Pilipino a naapektaran kalpasan ti nasao a ginggined.
VIDEO – HANNAH GALVEZ
