VIGAN CITY – Adu iti narpuog a pasdek ken adu ti naapektaran nga expressway ken train gapu iti napasamak a magnitude 6.9 a ginggined idiay Taiwan.
Iti pannaki-uman ti Bombo Radyo Vigan ken ni Bombo International Correspondent Rejohn Saraos a tubo iti ili ti Santa ngem agdama nga adda iti nasao a pagilian, adun dagiti naapektaran iti agsasaruno a ginggined a nariknada.
Segun ken ni Saraos, idi pay laeng kalman September 17, 2022 ket nariknadan ti magnitude 6.4 a ginggined idinto a sakbay iti napasamak a 6.9 a ginggined itattay ket nariknada iti namin-uppat nga agsasaruno a napipigsa a ginggined.
Patienna a dagiti agsasaruno a ginggined a napasamak ti rason iti pannakarpuog dagiti pasdek.
Nupay kasta, pinasingkedanna a natalgedda nga agakkadua iti liga kalpasan iti napasamak a ginggined idinto a kasla normal ti panagrikna dagiti Taiwanese iti napasamak a ginggined gapu ti agsasaruno a panagdayyegna.
Immunan a naibayog iti magnitude 7.2 a ginggined ngem nasukatan iti magnitude 6.9 a ginggined.
