VIGAN CITY – Impasigurado ti manager iti karnabalan iti ili ti Narvacan nga isunan ti makaammo ti magastos iti ospital dagiti nadunor gapu ti pannakatinnagda idi rabii iti panag-rides da iti ferries wheel.
Iti pannaki-uman ti Bombo Radyo Vigan ken ni Rey Vicencio, kargona latta dagiti menor de edad ta nadangranda iti panag-ridesda ngem inlawlawagna a nagarawda bayat iti panagtayyek ti ferries wheel a gappuanan ti pannakatinnagda.
Segun ken ni Vicencio, arigna karugrugi pay laeng ken nabuntog ti andar ti ferries wheel idi maysa kadagiti menor de edad iti natinnag idinto a ti maysa ket timpuak.
Dagiti biktima ket maysa nga agtawen ti sangapulo ket tallo, estudyante a taga-Nagsayaoan, Sta. Maria idinto a ti maysa ket agtawen ti sangapulo ket lima, estudyante nga agnaed idiay Brgy. San Antonio, Narvacan
Imbingay pay ni Vicencio nga iti uneg iti mano a tawen ket umuna a gundaway pay laeng nga adda iti natnag a naglugan ta sigsiguradoenda a natalged dagiti ag-rides.
Balakadna kadagiti kayatna nga aglugan ti ferries wheel a rumbeng nga agsadag ken simpaen ti panagtugaw, saan nga agdumog wenno agpasango, aginggem a nalaing ken nu kadagiti attiddog ti buokna ket rumbeng nga agpinggol tapno saan a maisab-it.
Gapu iti pasamak idi rabii ket naipasardeng pay laeng ti operasyon ti nasao a ferries wheel tapno maimbestigaran ti napasamak.
VC – REY VICENCIO
