VIGAN CITY – Nangiruar ti National Grid Corporation of the Philippines iti Yellow ken Red alert iti Luzon Grid Status ita nga aldaw, Abril 19.
Ti yellow alert ket iti oras ti alas dose iti tengnga ti aldaw agingga alas tres iti malem, alas kuatro iti malem agingga alas sais iti rabii ken alas dyes agingga alas onse iti rabii.
Ti met red alert ket manipud iti alas tres agingga alas kuatro iti malem, ken alas sais agingga alas dyes iti rabii.
Mairuar ti yellow alert no ti operating margin ket saan a makanay tapnon mapunwan ti contingency requirement ti transmission grid idinto a ti red alert ket no saanen a makanay ti power supply a mangragpat iti consumer demand ken ti regulating requirement ti transmission.
Iti pannaki-uman ti Bombo Radyo Vigan ken ni Jenny Afroilan, 13, 594 megawatts ti available capacity idinto a ti peak demand ket 13, 127 megawatts, kayatna a sawen ket adda laeng dua gasut agingga tallo gasut a megawatts a reserba a daytoy ket agkurang tapno mapagtalinaed a nasayaat ti status ti grid.
Sangapulo ket siam a power plants ti nai-force outage, idinto nga adda tallo nga agan-andar iti derated capacities – buklen iti 2,284.3 MW a saan nga available iti grid.
Innayonna a dakkel ti epekto ti nabara a panawen iti ngimmato a konsumo ta dakkel ti demand ngem adda dagiti wagas tapno makatiped iti koriente kas ti panangikkat kadagiti saksakan dagiti appliances no saan nga ar-aramaten, panangdalus iti filter ti aircon ken blades ti electric fan, panangiskedyul ti panagplantsa iti maminsan laeng makalawas wenno aramiden iti off-peak hours wenno sakbay nga agalas nuebe iti bigat ken kalpasan iti alas nuebe iti rabii, panangdalus ti silaw, ken saan a sansanen ti pananglukat iti refrigerator.
