Nagsublin ti operasion ti Lugo Beach Floating Cottages idiay Barangay Dadalaquiten, Sinait, Ilocos Sur.
Segun ken ni Barangay Captain Roselily Payoan, saan pay a naisubli amin iti kabaybayan dagiti cottage ta yur-urayda ti deklarasion manipud iti PAGASA nga awanen ti pangta ti bagyo.
Innem pay laeng a floating cottages ti imbabada ken nagsubli ti operasionna, ngem no addanton pakaammo nga awanen ti bagyo ket mabalindanto nga ibaba aminen dagiti mega ken super deluxe floating cottages.
Innayon ni Payoan a dakkel ti nagbalin nga epekto iti barangayda ken iti pastrek ti Lugo Beach ti temporaryo a pannakaisardeng ti operasion gapu iti oil spill ti maysa a barko.
Kalpasan idi ti assessment ti Philippine Coast Guard-Ilocos Sur ket impasardengda ti operasion kas precautionary measure.
Gapu dayta, singirenda ti danyos manipud iti akinkukua ti barko gapu iti nagbalin nga epekto ti insidente iti operasionda ken iti pagbiagan dagiti agindeg.
