VIGAN CITY – Umaboten iti sangagasut duapulo a bilion a pisos ti pukaw iti hog industry gapu ti African Swine Fever malaksid pay iti lugi dagiti agilaklako iti feeds ken tuyo kas pinasingkedan ni Samahang Industriya ng Agrikultura Chairman Rosendo So.
Iti ekslusibo a pannaki-uman ti Bombo Radyo Vigan ken ni So, namnamaenna a ti pannakaideklarar ti state of emergency ditoy pagilian gapu ti ASF ket pumaspas ti pannakaited ti bayad kadagiti apektado a hog raiser a natay iti baboyna agsipud ta iti agdama ket innem a bulan pay ti yurayda sakbay a maawatda ti kompensasyon.
Impaganetget ni So nga idi koma pay laeng napan a tawen ket naideklararen ti state of emergency ngem nupay kasta ket pagyamananda dagiti senador a nangkiddaw iti nasao a banag.
Malaksid ti dayta, masapul a ti national government ti mangdesisyon ken paggapuan iti pondo tapno saan a marigatan dagiti Local Government Unit agispud ta adda dua gasut a bilion a pisos a pondo ti Malakanyang a mabalin a pagalaan ti pagbayad kadagiti apektado a hog raiser kasta payen nga ipakpakonsiderana ti pannakasimpa dagiti border a mangsagat kadagiti maipaspastrek nga imported meat product ditoy pagilian.
