VIGAN CITY – Panaglabsing iti Provincial Ordinance No.15-06, Series of 2015 (Sec.4 Para J and EO # 24 series of 2019 wenno temporary ban of Entry of pork products iti sanguen dagiti nakemmeg idi kalman idiay Brgy. Becques, Tagudin.
Iti pannaki-uman ti Bombo Radyo Vigan ken ni Provincial Quarantine Officer Martel Quitoriano, naglibas nga immuna da Teresita Manzano, agtawen ti limapulo ket maysa, balasang ken agnaed idiay San Agustin Victoria, Tarlac a agmaneho iti puraw a Mitsubishi L300 kaduana ni Eliza Marcelo, agtawen ti uppat a pulo ket maysa, balasang nga agnaed idiay Bahay Pare, Candaba, Pampanga ngem kinamat dagiti kameng ti Provincial Quarantine isu a nakemmegda.
Segun ken ni Quitoriano, naala kadakuada iti walo a case iti balut, walo a case iti nalabbaga nga itlog, sangagasut a karton iti itlog pugo ken sangapulo a bundle iti pork chicharon nga aggatad iti tallopulo a ribo a pisos.
Nu pay adda iti dokumento nga impakita dagiti nakemmeg ket saan nga agpapada iti nakailanad kadagiti makita a produkto iti luganda.
